كنت ضد 25 يناير واعتقد لو الزمن رجع تاني هكون عند نفس موقفي، بس الزمن مش هيرجع تاني والحصل حصل دلوقتي كل واحد عليه دور سواء كان موافق او مش موافق، مؤيد أو معارض لـ25يناير، لان المبرر الوحيد للكل هو كان مصلحة البلد. ومش معني اني كنت ضد 25يناير في الاول اني مع الظلم او الفساد بالعكس تماما، انا ضد للوسطة والرشوة وكل حاجة غلط في كل وقت وفي كل زمان ومكان.
طول الفترة من 25 يناير حتي 11 فبراير كنت بنزل للتأيد للرئيس السابق لاني شايفة البلد مش هتتغير لما شخص بعينه يمشي ويجي مكانه حد تاني، البلد هتتغير لما احنا نتغير، البلد هتتغير لما نبطل نرمي زبالة في الشارع، البلد هتتغير لما نبطل ندي امين الشرطة 10 ولا 20 ولا حتي 50 جنيه عشان كسرنا الاشارة، البلد هتتغير لما نلتزم بحارات المرور، لما نخلص في شغلنا، لما نساعد كل الناس اللي حوالينا اللي محتاجة مساعدة، لما نستغل كل حقوقنا بالطرق المشروعة، لو كله حصل ولسه البلد متغيريتش يبقي ساعتها كنت هكون اول واحدة تهتف يسقط يسقط حسني مبارك.
بعد 11 فبراير الريس تنحي والناس لسه زي ماهيه وكل واحد تسألوا انت مبسوط ليه يرد قول كلمة واحدة الكل حافظها ده كان ناهب فلوسنا ويزورا في الانتخابات طيب حضرتك عارف فلوسك ديه عبارة عن ايه اصلا؟ طيب انت عارف ان كل الناس لو راحت الانتخابات ماكنش حد هيقدر يزورها او علي الاقل تبقي عملت دورك يرد يقول وانا اروح ليه اصلا لما هي هتزور ... طيب لو انا مثلا لسه في الكلية والدكتور دخل قال ان مش هنجح حد هل ده مبرر اني مذاكرش ومادخلش الامتحان اصلا؟؟ ولا المفروض اذاكر وادخل احل اللي اعرفه ويبقي انا عملت اللي عليا؟؟ صح ولا ايه؟؟ بعد 11 فبراير انا هديت وقولت خلاص البلد خربت وفقدت الامل في كل حاجة وبقي كل حاجة عندي عادي لحد يوم 19 نوفمبر او بالاحري 20 نوفمبر.
يوم 19 نوفمبر - احداث محمد محمود - ناس فجأة اختفت ومحدش عارف عنهم حاجة لحد تاني يوم الصبح عرفت انهم اتقبض عليهم في الاحداث ... ساعتها بس حسيت ان مش كل اللي بيتم القبض عليه بلطجية او مثري شغب كما يزعمون علمت يومها ان هؤلاء شباب لهم هدف حقيقي ولهم مطالب ولهم أمل وليس مجرد شباب لاهدف لهم هم شباب وجدوا هدف ليتفوا حوله....
فاكرين زمان ايام كأس الأمم الأفريقية يوم ماخدنا الكأس في مصر وبعدها في جنوب افريقيا تقريبا.. كل الناس كانت علي كلمة واحدة الشباب دول لازمهم هدف يتلفوا حوله عشان يخرجه فيه طاقتهم... هؤلاء الشباب أوجدوا لأنفسهم الهدف الذي لم يقدر أبائهم أن يجدوه ... وجد ذلك الهدف طريقه الي عقل كل منهم دون وسيط...
ثورة يناير ثورة شباب وليس ثورة شعب وليست ايضا ثورة كل الشباب فانا منهم ولم اكن معهم... ثورة ولدت دون اب او ام ... ولدت لتكون هي الملجأ الوحيد والطريق الأوحد ...
يوم التحول الأكبر ... هو اليوم اللي قررت فيه ان اتجه من مصطفي محمود إلي التحرير من أنا أسيف يا ريس إلي كلنا خالد سعيد يوم 24 يناير 2012 - بس بردو ارجع واقول التحول ده ماجاش فجأة .. ده جيه نتيجة لتراكم احداث كثير اثرت فيا خلال السنة كلها اكثرها طبعا احداث محمد محود...
في الاخر برده اذا كنت مصطفي محمود ولا تحرير سواء كنت مؤيدة أو معارضة .. انا وكل الناس علينا دور لازم نعملوا...
إذا كنت تحب بلدك.....أتقن عملك...ساعد غيرك..ثقف نفسك...تطلع لأراء مختلفة سواء كانت متماشية مع أراءك أو لا... إن جمالنا يقتن في اختلافنا
